Kristiano Ronaldo mund të ishte lojtar i kuqezinjve të “Milanit”. Ish-administratori i “Milanit”, Marko Fasone, në një prononcim për “Il Sole 24 Ore” ka zbuluar se ka pasur bisedime konkrete. Por ishte pikërisht Fasone që bindi presidentin Li të hiqte dorë nga ylli portugez.

Fasone nuk është më pjesë e klubit teksa u largua pas dështimit të “Milanit” që nuk arriti të kualifikohej në Ligën e Kampioneve. Ish-administratori tregon gjithashtu se nuk ka kontakte prej shumë kohësh me ish-presidentin Li.

“Është e vërtetë. Janghong Li dëshironte të merrte Kristiano Ronaldon te ‘Milani’. Zoti Li dëshironte të merrte CR7 pasi ndjente se kishte një forcë të madhe në tregun kinez. Lojtari dëshironte të largohej nga Madridi.

Ne jemi takuar në korrik 2017 me menaxherin e tij, Mendes, për të verifikuar kostot dhe gatishmërinë e lojtarit. Pastaj unë e binda të hiqte dorë nga ëndrra: Ronaldo kushtonte shumë. Unë mendoj se “Milani” u drejtua nga një bord i shkëlqyer drejtuesish. Bëmë 20 milionë euro më shumë në qarkullim.