Drama "Eldorado" me regji nga Stefan Çapaliku pas skenës së teatrit në Durrës, nuk mungoi dhe premierë në Tiranë, ndërsa nesër në mbrëmje do të jetë në qytetin e Shkodrës. Vepra teatrore mbrëmë u shfaq në “ArTurbina” salla 150, me interpretimin e aktorëve Suela Bako, Ervin Doko, Andia Xhunga, Besmir Bitraku, Ina Morinaj, Ledian Gjeçi. Në veprën nga autori gjerman Marius von Mayenburg, shtrohet pyetja, si mund të jetohet kur krime kryhen në emër të demokracisë. “Te “Eldorado”, dramë e shkruar në vitin 2006, përtej pamjes së drejtpërdrejtë të teksturës shtrohet një pyetje kokëfortë: Si mund të vazhdojmë të jetojmë, kur krime të papërshkrueshme po kryhen në emër të demokracisë dhe qytetërimit perëndimor? Në vepër kemi Antonin, tregtar i madh pasurish të patundshme, falimenton prej spekulimeve. Financimi i banesës së kushtueshme është krejt i pasigurt, por përtej kësaj, gruaja e tij, një pianiste e palumtur me talentin e saj, i rrëfen se është shtatzënë. Vjerrën e kamur e bind të investojë në një pronë në një qytet të largët, të sapo pushtuar nga një fuqi perëndimore. Kur në qytetin e huaj shpërthen një revoltë kundër pushtuesve dhe humbet përfundimisht shpresa për fitim, vjerra këmbëngulëse kërkon mbrapsht kapitalin e saj dhe këtu nis tatëpjeta e Antonit. Skena qesharake deri në dhimbje të lumturisë në martesë dhe të gjendur në kolaps, i lënë vendin ndërtimeve të larta dhe bombave, që bien në Berlin ose Bagdad. Në sfond mbetet prania këmbëngulëse e luftërave të largëta dhe gjysmë të harruara të perëndimit, të cilat mbeten të fiksuara në ekrane vetëm si pamje periferike. Eldorado pyet se si mund të jetojmë, kur në emër të fesë ose demokracisë perëndimore ushtrohet një dhunë e papërshkrueshme. Marius von Mayenburg lindi më 21 shkurt 1972 në Mynih. Në vitin 1994, Mayenburg filloi studimet në Hochschule der Künste në Berlin. Drama e tij e parë, “Haarmann”, u vu në skenë në Deutsches Theater në Berlin më 1996. Që nga viti 1999 ai është dramaturg në Schaubuhne në Berlin. Ai u bë i njohur kryesisht me dramën e tij “Fireface”, shkruar në 1997. Shfaqja ishte produksion i teatrit bashkiak të Mynihut më 1998. Më pas Marius von Mayenburg është i pranishëm në teatrin Kleist në Frankfurt dhe në Deutsches Schauspielhaus në Hamburg.