Shqiptarët janë pothuajse çdo ditë në faqet e shtypit në Mbretërinë e Bashkuar. Kjo për aktivitetin i tyre i paligjshëm, kalimin e kufirit me metoda të sofistikuara, por pa harruar edhe akuzën e fortë e cila lidhet me kultivimin dhe shitjen e lëndëve narkotike, kryesisht drogave të forta.

Sipas shkrimeve të mediave angleze, aktiviteti kriminal i bandave shqiptare është tashmë një problem i shtuar për shoqërinë dhe jetën e anglezëve. Media britanike “Sunday Ekspres” ka publikuar sot një shkrim me titullin: “Bandat shqiptare të drogës, vazhdojnë tregtinë në Britaninë e Madhe”. Ky raportim mediatik etiketon shqiptarët si protagonistë aktivë në fushën e trafikimit dhe shitjeve të lëndëve narkotike.

“Banda Hellbanianz janë një nga disa banda që kanë lidhje me mafien në atdheun e tyre që merren drejtpërdrejt me kartelet e drogës në Amerikën Jugore. Besohet se bandat si Hellbanianz kanë tregtarë rivalë për shkak të furnizimit të drejtpërdrejtë të barnave me cilësi të lartë. Grupet e krimit shqiptar kanë krijuar një profil të lartë dhe shkallë të ndikimit brenda krimit të organizuar në Mbretërinë e Bashkuar dhe kanë qasje të konsiderueshme në tregun e trafikimit të drogës në Mbretërinë e Bashkuar, veçanërisht kokainë”, thuhet në artikull.

“Aktiviteti i shqiptarëve po zgjerohet dhe rëndësia e tyre në treg ka krijuar rritje”. Mes tjerash shkruhet se shumë anëtarë të bandave janë fëmijët e shqiptarëve, të cilët shkuan në tokën angleze gjatë viteve 1990.

Hellbanianz dëgjon muzikën rap shqiptare, ndërsa glorifikon drogat dhe dhunën nën të njëjtin emër. Ata kanë publikuar video me armë dhe municione, të cilat shfaqen të mbuluara me një shumë të madhe parash.

Sipas artikullit, motoja kryesore e këtij grupi është: “Ne jemi Perëndia e rrugëve”. Një nga anëtarët e grupit ka shpërndarë video me armë në faqet sociale, ndërsa këto i shoqëron edhe me përshkrimin: “E mbaj këtë gjatë gjithë kohës, sepse unë duhet të bëj gjëra çdo ditë. Po, është e rrezikshme, por i vetmi mik”.

Anëtarët e burgosur të bandës kanë postuar imazhe të vetes së tyre duke pirë duhan. Një anëtar tjetër i bandës, me pseudonimin Pato shfaq shenja krenarie dhe mburrje në Instagram: “Burgu është bërë si një shtëpi dhe si kafene në Amsterdam”.

Ky shkrim i gjatë tregon se nga ky aktivitet ka patur përleshje mes grupeve dhe bandave të drogës, ndërsa nuk kanë munguar edhe arrestimi dhe goditja e grupeve të forta. Bashkë me sjelljet e tjera, bandat shqiptare siç shkruan media britanike tregojnë edhe makinat e shtrenjta, të cilat i kanë përftuar nga aktiviteti i paligjshëm i shitjes dhe prodhimit të lëndëve narkotike.