Presidenti i Kosovës Hashim Thaçi, flamurtari i procesit të shkëmbimit të territoreve me Serbinë, po merr flamurin e kundërshtarit themelor të kësaj ideje. Por në fakt, ai edhe në këtë proces është i vonuar e flet si gjithmonë, një ditë pasi Vuçiçi nga Serbia përcakton vijën e sjelljes. Dje në Medvegjë, presidenti serb Vuçiç dhe kryeministrja Brnabiç, veç e veç e dënuan me vdekje pazarin e shkëmbimit të territoreve. Vuçiq tha se po kthen një përgjigje finale dhe nga Medvegja deklaroi se “ky qytet do të mbetet në Serbi së bashku me Banjën e Sijarinës. Mos u shqetësoni për deklarimet e Prishtinës, janë thjesht kërcënime”. Kurse kryeministrja Ana Brnabic ishte edhe më eksplicite: “Deklarimet e Thaçit se Lugina e Preshevës do t’i bashkohet Kosovës mund të jetë vetëm një ëndërr. U bëj thirrje institucioneve në Prishtinë t’i kthehen realitetit. Të mos i ngrenë barrierat dhe t’i kthehen dialogut”, tha ajo.
Pasi kjo lojë duket e destinuar të dështojë, me sa duket ngaqë sponsorët ndërkombëtarë të saj kanë hequr dorë, presidenti Hashim Thaçi e harron gjithë historikun 6-mujor të deklaratave të tij dhe nga “samiti” me Edi Ramën thotë: “Kërkohet nga ju zgjim që t’i ndërpreni këto ide që nuk janë në interes të kombit. Shkëmbimi i territorit kurrë nuk do të ndodhë…. Ndarja e Kosovës, pa shkelur mbi trupin tim, nuk guxon askush ta prekë një milimetër të Kosovës”.
Me sa duket ashtu do të ndodhë dhe shkëmbim territoresh s’ka për të patur, por duhet patur parasysh, se ndryshimin e qëndrimeve, Thaçi e mori një ditë pas Vuçiçit, e jo si në rastin e hedhjes së idesë për shkëmbimin e territoreve, që e artikuloi disa ditë para kryeministrit të Serbisë