Nesër në mbrëmje luhet ndeshja e vitit për klube në arenën Europiane, e cila mbyll kompeticionin më të rëndësishëm për klube në “kontinentin e vjetër”, atë të “Champions League”.

Në këtë eveniment kaq të rëndësishëm do të marrë pjesë këngëtarja shqiptare me famë botërore Dua Lipa, e cila do performojë në ceremoninë hapëse të finales.

Sot Dua ka dhënë një intervistë për mediat angleze, pikërisht në stadiumin e Kievit, ku nesër në 20:45 do të luhet supersfida mes Real Madrid dhe Liverpul.

 Në intervistë ajo u shpreh se ishte shumë e emocionuar, duke qenë e vetëdijshme për rëndësinë e eventit dhe për faktin që do performojë para 75 mijë spektatoreve.

Në fund, e pyetur se cili do jetë ekipi triumfues sipas saj, ajo u përgjigj pa mëdyshje: “Liverpuli!”

Kjo mbase edhe për faktin se këngëtarja me origjinë nga Prishtina është lindur në Londër dhe dëshiron që ekipet angleze të rikthehen protagoniste në skenën europiane.