Ka dy javë që nga rënia e zjarrit në pyllin e kontesë Mendocino. Ndërsa shkaku dhe origjina e zjarrit janë ende nën hetim, zyrtarët thonë se zjarri është më i madhi në historinë e atij shteti.

119 shtëpi janë shkatërruar nga zjarret, ndërsa rrezikohen mbi 9 mijë të tjera. Disa banorë janë lejuar të kthehen për të parë dëmtimet e shtëpive të tyre. Mes tyre është edhe Laura Hemken.

“Zjarrëfikësit bënë një punë të mirë. Prona është djegur dhe kësaj radhe rreziku ishte shumë i madh. Ishte rreziku më i madh ndonjëherë. Kjo të bën të mendosh për masat që duhet të marrim.”

Shumë banorë kanë dalë vullnetarë për të ndihmuar zjarrëfikësit. Mundësia që zjarret të rindizen nga disa vatra që janë shuar, mbeten të mëdha. Tymi irritues dhe cilësia e keqe e ajrit përbëjnë rrezik serioz për shëndetin e vullnetarëve si Diego Olea Vargas.

“Pamë që dilte tym dhe u përpoqëm që ta mbajmë nën kontroll. Është shumë e vështirë, shumë nxehtë dhe më mirë po presim për zjarrëfikësit, sepse nuk duam që të shpërthejë zjarri. Me kalimin e viteve temperaturat po ngrihen.”

Mendocino është një konte bujqësore dhe e ardhmja e shumë prej banorëve mbështetet tek këto produkte.

“Të gjithë jemi prekur. Këtu bëhet rrushi e dardhat dhe shumë prej plantacioneve janë dhe gur. Me çfarë do të merremi tani?”, thotë Diego.

Zjarrfikësit në Kaliforni po luftojnë me dhjetëra zjarre ndërsa ai në “Mendocino Complex” është më i madhi, duke djegur më tepër se 121 mijë hektarë. Autoritet po lejojnë kthimin e banorëve në atë zonë, por mund të duhen disa javë dhe një fat i mirë për vënien plotësisht nën kontroll të zjarreve.