Presidenti amerikan, Donald Trump urdhëroi një sulm ajror që vrau gjeneralin e Gardës Revolucionare iraniane, Qassem Soleimaini. Ky i fundit drejtonte forcat elitare Quds. Ai u eliminua në Aeroportin Ndërkombëtar të Bagdadit, konfirmoi Pentagoni.

Bashkë me të u vra edhe Abu Mahdi al-Muhandis, zëvendëskomandant i Forcave të Mobilizimit Popullor, një milici iraniane me qendër në Irak, përgjegjëse për sulmet ndaj ambasadës amerikane në Bagdad.

Ky sulm ajror vjen në një kohë kur SHBA dhe Irani duket se po shkojnë drejt luftës totale. Presidenti amerikan, Donald Trump reagoi duke postuar thjesht një foto të flamurit amerikan, pa asnjë koment tjetër.

Gjenerali i fuqishëm iranian, Soleimani sapo kishte arritur në Bagdad në një fluturim nga Siria. Katër raketa precizioni u lëshuan nga një dron amerikan mbi dy makinat që mbanin gjeneralin dhe enturazhin e tij.

Burimet thonë se gjenerali u identifikua vetëm nga unaza e tij, pasi trupi ishte shkrumbuar. Po kush ishte gjenerali më u fuqishëm iranian? Ai shihej si njeriu që kishte projektuar ambicien iraniane për sa më shumë kontroll në Lindjen e Mesme. Realisht ai njihej si ministër i Jashtëm i vendit.

Gjenerali vlerësohej si arkitekti kryesor i luftës së presidentit Bashar al-Assad në Siri. Po ashtu ishte motori kryesor në luftën në Irak dhe të tjera konflikte në rajon. Ai vlerësohej për pushtetin që kishte. Disa e respektonin, të tjerë ia kishin frikën. Rreth tij ishin ndërtuar shumë mite dhe mediat sociale ishin të mbushura me meme.

Soleimani ishte njeriu më i fuqishëm në Iran pas Liderit Suprem. Në vitin 2013, ekspertët e CIA-s vlerësonin se ai ishte operativi i vetëm më i fuqishëm në Lindjen e Mesme. Mendohet se ai kishte lindur në një familje të varfër dhe nuk kishte ndonjë arsimim të madh. Megjithatë i ngjiti shkallët e karrierës përmes Gardës Revolucionare.