Liderët e Maqedonisë së Veriut, Shqipërisë dhe Serbisë janë mbledhur në Ohër për të diskutuar më tej idenë e Mini-Shengenit ballkanik. Të dielën pritet të ketë propozime konkrete, ndërkohë që projekti do zbatohet plotësisht në vitin 2021.
Por Deutsche Welle thotë se problemi është tek anashkalimi i Kosovës.
Në shkrimin e Norbert Mappes-Niediek, thuhet se si gjithmonë në rajon, djalli gjendet në detaje.
“Tre miqtë e rinj pothuajse rrethojnë plotësisht një të katërt me kufijtë e tyre: Kosovën. Udhëtimi pa pengesa nga Serbia në Shqipëri, siç premton Vuçiç, do të ishte shumë i largët nëse nuk përfshihet vendi që nuk njihet nga Serbia”.
Më tej, autori shton se shumë nga problemet që thuhet se do zgjidhen me Mini-Shengenin, janë çështje fort të debatueshme në kuadër të dialogut mes Prishtinës dhe Beogradit.
Edhe te diskutimi për bashkimin doganor, autori sheh një problem.
“Edhe para se Kosova të vendoste tarifat e saj ndëshkuese astronomike për mallrat serbë, ekzistonte frika se Serbia do ta shkatërronte me fuqinë e saj të lartë ekonomike peizazhin e biznesit që po lulëzon me delikatesë në Kosovë”.
Një tjetër pikëpyetje sërish në kuadër të bashkimit doganor lidhet edhe me faktin se tashmë Serbia është lidhur me Bashkimin Ekonomik Euro-Aziatik të Vladimir Putinit.
“A do tregtojnë lirisht këto vende të Ballkanit me Rusinë, Kirgistanin dhe Armeninë,” pyet gazetari.
Më tej, analiza ashpërsohet, pasi gazetari thekson se thelbi i këtij Mini-Shengeni është aksi i ri Beograd-Tiranë.
“Me inskenimin e një ‘pajtimi historik mes serbëve dhe shqiptarëve’ tre vjet më parë, përfituan serbi Vuçiç dhe homologu shqiptar, Edi Rama. Të dy vendet nuk kanë probleme me njëri-tjetrin dhe nuk do ishte e nevojshme që të pajtohen. Por kur mblidhen ‘serbët’ dhe ‘shqiptarët’, problemi i pazgjidhur i Kosovës mund të shmanget me një qark të shkurtër: është më e lehtë të negociosh me Tiranën miqësore sesa me Prishtinën e rëndë. Nga ana tjetër, Rama, që e sheh veten si ‘presidenti i të gjithë shqiptarëve’, pranon me kënaqësi udhëheqjen që i është ofruar. Interesat e Kosovës bien në ndryshk”, shkruan ai.
