Partia Demokratike i ka bërë thirrje qeverisë Rama sot të mos provokojë dhunën me banorët e Unazës së Re, të shmangë konfliktin e padëshiruar dhe të nisë dialogun me ta. Partia Demokratike ka reaguar nëpërmjet ish-deputeti Klevis Balliu për dëbimin që qeveria po u bën banorëve të Unazës së Re dhe provokimet e ditëve të fundit me forca policore dhe të IKMT.

Balliu ka cituar në vazhdimësi, ligjet ndërkombëtare që sugjerojnë dialogun e qeverisë me protestuesit në të gjitha rastet. "Dëbimi me dhunë i qytetarëve nga banesat e tyre është një akt i pastër në shkelje të rëndë të drejtave të njeriut, - tha ish-deputeti. - Këtë nuk e thonë vetëm banorët e Unazës së Re, nuk e thotë më vetëm PD-ja, por edhe OKB, organizata ndërkombëtare që është ngritur për të mbrojtur liritë, të drejtat dhe dinjitetin njerëzor.

Në një studim të publikuar së fundmi për banesat sociale, PNUD, programi për zhvillim i OKB, pohon se dëbimi me dhunë i qytetarëve nga banesat e tyre është shkelje flagrante e të drejtave të njeriut.

Këtë parim e njeh çdo qeveri demokratike, përveç qeverisë së korruptuar të Edi Ramës, që kërkon të dëbojë nga shtëpitë, pa dëmshpërblim, qindra qytetarë për t’i hapur rrugë projektit korruptiv të Unazës ku 1 km kushton 20 milionë euro!”