Forumi Rinor i Partisë Demokratike vijon nismën për t’i ardhur në ndihmë banorëve të prekur nga tërmeti i 26 nëntorit.

Së fundmi, kreu dhe anëtarë të FRPD-së kanë qenë në fshatrat Pojan dhe Pezë, shumë afër Tiranës, aty ku lëkundjet e tokës kanë lënë pas dëme jo të vogla.

Sipas Këlliçit, edhe sot, kur jemi gati një javë nga tërmeti shkatërrimtar, banorët janë në mëshirë të fatit pasi askush nuk u ka ofruar ndihmë.

Postimi i plotë i Belind Këlliçit

Në Pojan, në fshatin Pezë, vetëm 16 km larg Tiranës, aty ku tërmeti ka tronditur e shembur shtëpitë e dhjetëra familjeve, të cilat ende nuk kanë marrë asnjë kontakt dhe ndihmë nga askush. Kushdo që ka mundësi të ndihmojë, duhet të vijë ta shohë vetë me sy gjendjen në të cilën jetojnë aktualisht këto familje, me fëmijë të vegjël e invalidë. Askush nga Bashkia Tiranë apo instanca të tjera shtetërore nuk është kujtuar për këta banorë që jetojnë e votojnë në kryeqytet! Apeli jonë sot shkon për cilindo nga ju! Edhe një batanije ose një pako ushqime, do të thotë shumë për këta banorë. Mirënjohje pafund Aleancës për Teatrin për veshjet e mundësuara për fëmijët e vegjël si dhe të rinjve të FRPD për pakot me ushqime.