Zëdhënësi i Presidentit Tedi Blushi ka replikuar në distancë sot me Taulant Ballën, Sekretarin e Përgjithshëm të PS duke e paralajmëruar se fakte të reja do të dalin në dritë deri më 2 mars, ditën kur kreu i shtetit ka thirrur popullin në një tubim në bulevardin kryesor të Tiranës. “Fakte të reja do të dalin Tao dhe ti ke kohë deri në 2 mars të marrësh kthesën e radhës, siç e merr gjithmonë,” i ka dërguar mesazh Blushi, Taulant Ballës, duke iu drejtuar me ironi.

MESAZHI I PLOTE I BLUSHIT:

Lum Shqipëria për Tao Taon se ky vetëm për hapjen e negociatave punon. Ka harruar që e ka festuar tre herë çeljen e negociatave deri tani.Ka harruar që ngritja e Gjykatës Kushtetuese është kyç për çeljen e tyre. Po ligjin anti-kushtetues Dvorani pse e miratuat pa pritur Venecian?

S’ka nevojë, thotë Tao Tao, sepse pamë disa sugjerime që Venecia u ka dhënë disa vendeve të tjera që kanë Kushtetutë tjetër nga e jona dhe s’mund të ndalonim ta bënim fakt të kryer ligjin mafioz të rrëmbimit të Gjykatës Kushtetuese.
Po me ish-ambasadorin e nderuar Cutillo që Iu lutët të dilte në TV e të vinte në diskutim dekretin e Presidentit si do t’ia bëni?! Apo s’ka problem se ai iku e s’merr vesh që ju e pretë në besë?!
Po me ambasadën e SHBA si do ia bëni, se edhe ajo bëri goxha deklaratë për të thirrur Venecian!? Se ju si proamerikanë të paparë s’lëvizni asnjë presje pa u konsultuar me ta!

Duan të sabotojnë ndihmat (borxhet) thotë Tao.Vetëm një PPP e tyre shkon 1 miliardë euro! Edhe 20 miliardë euro borxhe të japë bota, duke rrëmbyer Gjykatën Kushtetuese në mënyrë mafioze nga kjo bandë, asgjë nuk do të shkojë në xhepat e shqiptarëve, por në xhepat e tyre dhe të disa kreditorëve. Ah po, shqiptarët do të fitojnë si gjithmonë shumëfishimin e taksave. Fakte të reja do të dalin Tao dhe ti ke kohë deri në 2 mars të marrësh kthesën e radhës, siç e merr gjithmonë," ka përfunduar Blushi.

Replika u bë pasi Balla deklaroi për medias paradite se “ne nuk kemi një krizë me presidentin. Ka presidenti një krizë me Ilir Metën.

Krizën e presidentin me Ilir Metën. Duhet ta zgjidhë presidenti me Ilir Metën. Ilir Meta duhet të ndajë përfundimisht nëse do të vazhdojë të jetë një nga liderët e opozitës apo të vijojë me president i Republikës.

Ai është një institucion në hetim parlamentar, në një republikë parlamentare, sipas Kushtetues, për shkelje të rënda të Kushtetutës.

Në rast se Komisioni Hetimor i gjen shkelje, bazuar në hetimin që po bën, në vijim të praktikës, dhe nëse Kuvendi voton me 94 vota shkarkimin, kjo procedurë kalon në Gjykatën Kushtetues”.