Ditët e fundit po ‘hapen petët e lakrorit’ sërish për çështjen e ndarjes së Kosovës.

John Bolton, ish-këshilltari i presidentit amerikan, Donald Trump, ka deklaruar se shkëmbimin e territoreve e kërkuan Hashim Thaçi dhe Aleksandar Vuçiç, presidentët e Kosovës dhe Serbisë. Jo vetëm kaq, por në këtë histori ku ‘aktor kryesor’ është Edi Rama, është mpleksur edhe ish-kryeministri britanik, Tony Blair.

Por këto gjëra janë denoncuar kohë më parë publikisht nga kryetarja e Komitetit të Helsinkit në Serbi, Sonja Biserko.

Në një intervistë në tetor të vitit 2018, ajo tha se Edi Rama i ka nisur bisedimet për ndarjen e Kosovës dy vite më parë në Nish të Serbisë.

Në një intervistë për revistën Vreme, ajo do deklaronte: “Ndonëse nisma për ndarjen doli së fundi në sipërfaqe, ajo ka zier së paku për dy vite. Në të vërtetë, Beogradi gjatë gjithë kohës ka kërkuar partner në Tiranë dhe më në fund e ka gjetur atë: është kryeministri shqiptar Edi Rama. Ato bisedime (për ndarjen) filluan para dy vitesh kur Rama ishte në Nish, por këto atëbotë e zbuluan Uashingtoni dhe Londra”.

Më vonë, shtoi Biserko, idesë për ndarjen e Kosovës iu bashkuan dhe një sërë figurash të njohura nga Perëndimi, siç është Wolfgang Petritsch, i cili punon për një zyrë avokatore që lobon për qeverinë serbe, pastaj Tony Blair, ish-ambasadori amerikan në Beograd, Cameron Munter, Aleks Soros, por edhe Ivan Vejvoda, Jelena Miliç, Ivan Krastev…

Biserko thotë se edhe pse është shitur si ide amerikane, “asnjë zyrtar amerikan nuk ka thënë se është për ndarjen e Kosovës”.

Sipas saj, Aleks Soros, i biri i filantropit të njohur, ka zhvilluar një diplomaci shëtitëse mes Vuciç, Thaçit dhe Ramës për këtë ide.