Në fabrikën e riciklimit e cila u shkrumbua një ditë më parë në zonën e Kasharit janë aktivizuar disa vatra të reja zjarri.

Për të vënë situatën në kontroll kanë ndërhyrë menjëherë rojet  e objektit, por pa sukses. Flakët janë shuar vetëm me mbërritjen e zjarrfikëses.

Një ditë më parë qindra ton mbetje plastike u përfshinë nga flakët. Zjarri vazhdoi disa orës jashtë kontrolli edhe pse në vendngjarje u dërguan të gjitha forcat zjarrfikëse të Tiranës, dy mjete të ushtrisë dhe dy autobotë të ujësjellësit të bashkisë. Zjarri masiv ishte kërcënues edhe për bizneset ngjitur. Flakët përpinë edhe shtyllat e energjisë elektrike dhe OSHEE njoftoi djegien e linjës që lidh Unazën e Re me zonën e Mëzezit.

Zjarri ngriti një re toksike që shkaktoi probleme shëndetësore për zjarrfikësit që luftonin me flakët dhe banorët e zonës përreth. nga Prokuroria po vazhdo hetimet, por të dhënat e para tregojnë se masat e sigurisë nga mbrojtja kundër zjarrit në këtë fabrikë ekzistonin vetëm në letër sepse në realitet, në fabrikë nuk kishte as fikëse zjarri dhe as ujë.