Gazeta spanjolle “ElConfidencial” shkruan se kryeministri spanjoll Mariano Rajoy zakonisht nuk udhëheq fushatat kundër BE-së. Megjithatë, shkruan ky medium, ai e ka humbur “Luftën Ballkanike”.

Sipas gazetës, qeveria spanjolle është përpjekur që Kosova të mos marrë trajtim shtetëror në samitin e ardhshëm të vendeve të Ballkanit Perëndimor në Sofje. I vënë në presion me çështjen e Katalonisë, thuhet më tej, Rajoy e ka bërë të qartë që në fillim se partnerët e tij nuk do të ulen në të njëjtën tryezë me Presidentin e Kosovës, Hashim Thaçi.

Megjithatë këmbëngulja e tij ishte e kotë, shkruan “ElConfidencial”. Kryeministri Rahoy dështoi, siç thuhet, t’i bëjë partnerët e tij në BE të bashkohen me protestat në një samit të planifikuar që do të mbahet në Bullgari më 17 maj.

Kosova, e cila është pjesë e “Ballkanit Perëndimor” me Serbinë, Malin e Zi, Maqedoninë, Bosnje dhe Herzegovinën dhe Shqipërinë, do të marrë pjesë në samit. Sipas “ElConfidencial” Rajoy do të shkojë në Bullgari, por do të jetë atje për t’u takuar me autoritetet lokale dhe do të jetë i pranishëm në një darkë me liderët evropianë, një ditë para samitit – dhe pastaj do të kthehet në vendin e tij.

Dhe ndërsa pritet një konfirmim zyrtar nga Madridi, një mesazh tashmë është dërguar në Bruksel se Rajoy nuk do të marrë pjesë. Gjithashtu, sipas mediumit spanjoll, edhe burimet e qeverisë spanjolle kanë konfirmuar se Rajoy nuk do të shkojë, edhe pse pjesëmarrja e Spanjës në samitin është ende një çështje e hapur, raporton tg.

Gjithashtu është shtuar se Rajoy nuk pritet të ndryshojë pozicionin e tij as në minutën e fundit. Spanja nuk është e vetmja anëtare e BE që nuk e ka njohur Kosovën, e cila deklaroi pavarësinë dhjetë vjet më parë.

Greqia, Qiproja, Rumania dhe Sllovakia, të gjitha për arsye të ndryshme, nuk e pranojnë pavarësinë e Kosovës, por të gjithë do të marrin pjesë në samit, dhe Rajoy do të jetë i vetmi që do të mungojë. Spanja, e cila aktualisht po fokusohet në Kataloninë, është vendi që ka mbajtur “pozicionin më të fortë” kur bëhet fjalë për samitin, shpjegojnë burimet e ElConfidencial.

Madje, sipas këtij mediumi, as vizita e Donald Tusk nga Këshilli Evropian në Madrid nuk e detyroi Rajoyn të ndryshonte qëndrimin e tij.