Kryeministri Edi Rama e përdori atë diversion që u shfaq mbrëmë tek organizatat ndërkombëtare edhe në fjalimin që mbajti në Kuvend, ku foli me tone të ashpra kundër medias dhe gazetarëve.

Mbrëmjen e shkuar, Përfaqësuesi i OSBE për Median, Harlem Desir la të kuptohet se mund të mbështesë qeverinë shqiptare për këtë nismë, pavarësisht se pikat më të kritikuara nga gazetarët, nuk ishin hequr nga projektligjet.

Qëndrimi i Desir, i cili gjeti raportim të gjerë në median pranë qeverisë, e cila në një masë jo të vogël, e humbi mundësinë për të raportuar mbi deklaratën e Komisionit Europian, ku qeveria e kryeministrit Edi Rama këshillohet në mënyrë eksplicite të kufizojë rregullimin vetëm te media audiovizive si dhe të punojë me zyrën e Komisioneres së Këshillit të Europës për të Drejtat e Njeriut, znj. Dunja Mijatoviç.

Mijatoviç është një eksperte e medias dhe në deklaratën e parë të saj mbi këtë çështje, kërkoi që “interneti të mbetet i hapur dhe forum publik”, pra që të mos rregullohet nga qeveria.

Por pikërisht duke parë se KE dhe KiE janë kundër nismave të qeverisë, Rama u mbrojt pas OSBE-së, duke thënë se projektligjet plotësojnë standardet ndërkombëtare. Sa i përket KE dhe KiE, ai tha se ato nuk kanë lexuar nismat dhe janë mashtruar nga organizatat e mediave në Shqipëri.