Institucionet shtetërore po grabisin shqiptarët, gjithnjë e më shumë, gjithnjë e më të babëzitura. Ka qenë raporti i fundit i Kontrollit të Lartë të Shtetit i cili ka konstatuar që vetëm në vitin 2017 janë vjedhur 825 milionë euro.  Janë konstatuar shkelje pothuajse në të gjitha institucionet. Në raportin prej 280 faqesh, i cili është dorëzuar në Kuvend nga ana e KLSH, thuhet se shkeljet më të mëdha me efekte të konsiderueshme në kundërshtim me kërkesat ligjore mbeten në fushën e keqmenaxhimit të të ardhurave dhe shpenzimeve të fondeve buxhetore; keqadministrimit të pronës shtetërore e pasuar nga parregullsitë dhe inefeciencat e fushës së prokurimit publik.

 “KLSH nga auditimet e kryera në vitin 2017 ka identifikuar mungesë përgjegjshmërie nga titullarët e institucioneve të çdo niveli, mosnjohje të kërkesave të ligjit të menaxhimit financiar, nivele të dobëta dhe inefeciencë të sistemeve të kontrollit të brendshëm, duke krijuar të gjitha mundësitë për shpenzime jo në përputhje me kërkesat ligjore dhe efektivitet të ulët në shpenzimin e fondeve buxhetore. Nga auditimet e këtij viti, KLSH-ja ka konstatuar se vijojnë praktikat dhe vendimmarrjet institucionale me efekte negative në fondet publike”. Qartësisht, KLSH-ja flet për një qeverisje të degraduar, e cila në finale, sipas saj, ka sjellë një dëm prej 825 milionë eurosh. Por duket se kjo rrugë abuzimi është e vjetër. “Dëmi i konstatuar ka një prirje negative, të konsoliduar në vitet e fundit”, theksohet në raport.  

KLSH ka bërë edhe kallëzimet përkatëse penale. Janë ngarkuar me përgjegjësi penale 129 persona nga të cilët: 23 titullarë institucionesh (7 Bashki dhe ish-Komuna, 7 ZVRPP, 4 ALUIZNI, 1 SH.A. dhe 4 të tjerë);  41 nëpunës të nivelit drejtues të tjerë (pa përfshirë 23 titullarët); 5 subjekte private; 60 nëpunës të tjerë.