Partia Demokratike ka zhvilluar mbrëmjen e sotme një mbledhje të gjerë të thirrur nga Sekretari i Përgjithshëm Flamur Noka, me morën pjesë edhe drejtuesit politik të qarqeve dhe kryetarët e degëve të PD nga mbarë vendi, ku temë e diskutimit ishte mosbindja civile e thirrur në datë 29 tetor ora 17:00.

Deputetja e PD-së, Albana Vokshi, në postimin e saj në Facebook, ka bërë publike vendimmarrjen e sotme të demokratëve, ku tregohen akset kryesore në Shqipëri të cilat do të bllokohen nga qytetarët, në shenjë proteste, ku kërkojnë qeveri teknike, si e vetmja rrugë për të garantuar zgjedhje të lira e të ndershme.

‘Bashkohuni me ne për t’i dhënë fund kapjes së shtetit dhe për t’i hapur rrugë një qeverie teknike, që do të garantojë procesin zgjedhor të pandikuar nga interesat klienteliste dhe presionet e pushtetit’, shkruan Vokshi.

Postimi i plotë:

Në selinë qendrore të Partisë Demokratike u zhvillua një mbledhje e gjerë, ku morën pjesë drejtuesit politik të qarqeve dhe kryetarët e degëve të PD nga mbarë vendi. Në këtë takim u riafirmua vendosmëria për të vazhduar mosbindjen civile deri në vendosjen e një qeverie teknike, si e vetmja rrugë për të garantuar zgjedhje të lira e të ndershme.

Të martën, më 29 tetor, ora 17:00, mosbindja civile do të zbresë në akset kryesore të vendit:

 1. Segmenti “Casa Italia - Sheshi Shqiponja”

 2. Rrethrrotullimi Milot

 3. Rrethrrotullimi Shkozet

 4. Rrethrrotullimi Bradashesh

 5. Rrethrrotullimi Rrogozhinë

 6. Rrethrrotullimi Levan

Bashkohuni me ne për t’i dhënë fund kapjes së shtetit dhe për t’i hapur rrugë një qeverie teknike, që do të garantojë procesin zgjedhor të pandikuar nga interesat klienteliste dhe presionet e pushtetit.